ກອງປະຊຸມສະພາປະຊາຊົນແຂວງອຸດົມໄຊຊຸດທີ I ສະໄໝສາມັນເທື່ອທີ 5 ໄຂຂຶ້ນຢ່າງເປັນທາງການ.

ທ່າມກາງ​ບັນຍາກາດ​ທີ່​ທົ່ວ​ພັກ, ທົ່ວ​ກອງ​ກອງທັບ ​ແລະ ທົ່ວ​ປວງ​ຊົນລາວ​ບັນດາ​ເຜົ່າ ພວມ​ອອກ​ແຮງ​ແຂ່ງຂັນ​ກັນ​ສ້າງ​ຂະ​ບວນການ​ຄໍານັບ​ຮັບ​ຕ້ອນ​ວັນ​ສໍາຄັນ​ຂອງ​ຊາດ, ຂອງ​ພັກຢ່າງ​ເປັນ​ບະ​ບວນຟົດ​ຟື້ນ. ​ແຂວງອຸດົມ​ໄຊ​ໄດ້​ເປີດ​ກອງປະຊຸມ ສະໄໝສາມັນເທື່ອທີ 5 ຂອງສະພາປະຊາຊົນແຂວງ ຊຸດທີ I ຂຶ້ນ​ຢ່າງ​ເປັນ​ທາງ​ການ ​ໃນ​ຕອນ​ເຊົ້າ​ວັນ​ທີ່ 30 ສິງຫາ 2018 ທີ່ຫ້ອງປະຊຸມຫ້ອງວ່າການປົກຄອງແຂວງ. ພາຍໃຕ້ການເປັນປະທານຂອງ ທ່ານ ບຸນລອດ ອ່ອນພະຈັນ ຮອງເລຂາພັກແຂວງ, ສະມາຊິກສະພາແຫ່ງຊາດ, ປະທານສະພາປະຊາຊົນແຂວງອຸດົມໄຊ. ເຂົ້າຮ່ວມເປັນກຽດມີ ທ່ານ ປອ ຄໍາພັນ ເຜີຍຍະວົງ ກຳມະການສູນກາງພັກ ເລຂາພັກແຂວງ ຮັກສາການເຈົ້າແຂວງອຸດົມໄຊ, ທ່ານ ສົມພັນ ແພງຄຳມີ ກຳມະການສູນກາງພັກ ຮອງປະທານສະພາແຫ່ງຊາດ. ມີບັນດາທ່ານ ສະມາຊິກສະພາແຫ່ງຊາດ, ສະມາຊິກສະພາປະຊາຊົນແຂວງ, ການນໍາພັກ-ລັດ, ອາດີດການນໍາແຂວງ, ບັນດາພະແນກການ, ເລຂາພັກເມືອງ 7 ເມືອງ, ຜູ້ຕາງໜ້າສະຖາບັນ ແລະ ລັດວິສາຫະກິດ ພາຍໃນແຂວງ ເຂົ້າຮ່ວມ.

ກອງປະຊຸມຄັ້ງນີ້ ສະມາຊິກສະພາປະຊາຊົນແຂວງຈະໄດ້ຄົ້ນຄວ້າ, ປະກອບຄຳເຫັນ ແລະພິຈາລະນາຮັບຮອງເອົາການເລືອກຕັ້ງເຈົ້າແຂວງ ອຸດົມໄຊ ຕາມການສະເໜີຂອງຄະນະປະຈໍາສະພາປະຊາຊົນແຂວງ; ພິຈາລະນາຮັບຮອງເອົາບົດລາຍງານການສະຫຼຸບຕີລາຄາການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານຂອງແຂວງ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2018; ພິຈາລະນາ ແລະ ຮັບຮອງເອົາບົດລາຍງານການຈັດຕັ້ງປະຕິບັດແຜນການເຄື່ອນໄຫວວຽກງານ 6 ເດືອນຕົ້ນປີ ແລະ ທິດທາງຈຸດສຸມ 6 ເດືອນທ້າຍປີ ຂອງ ສະພາປະຊາຊົນແຂວງ; ພິຈາລະນາ ແລະ ຮັບຮອງເອົາ ຂໍ້ຕົກລົງຂອງທ່ານເຈົ້າແຂວງຈຳນວນໜື່ງ.

ນອກຈາກນີ້ໃນກອງປະຊຸມຍັງຈະໄດ້ຮັບຟັງ,ປະກອບຄຳເຫັນ ແລະ ຊັກຖາມຕໍ່ບົດລາຍງານຂອງບັນດາພະແນກການ ເປັນຕົ້ນບົດ​ລາຍ​ງານຂອງ​ພະ​ແນ​ກພະລັງງານ ແລະ ບໍ່ແຮ່ ກ່ຽວກັບການຈັດຕັ້ງປະຕິບັດມາດຕະການຄຸ້ມຄອງການຂຸດຄົ້ນບໍ່ແຮ່, ຫີນຜາຂອງນັກລົງທຶນພາຍໃນ ແລະ ຕ່າງປະເທດໃນໄລຍະທີ່ຜ່ານມາ ແລະ ວິທີແກ້ໄຂໃນຕໍ່ໜ້າ; ບົດລາຍງານຂອງພະແນກກະສິກຳ ແລະ ປ່າ​ໄມ້ ກ່ຽວກັບ​ການ​ຂະຫຍາຍເນື້ອທີ່ການປູກໄມ້, ເນື້ອທີ່ການປູກເຂົ້ານາແຊງ, ການຜະລິດກະສິກໍາເປັນສິນຄ້າ, ການຮັບຮອງ ແລະ ແກ້ໄຂຜົນກະທົບຈາກໄພທໍາມະຊາດຕໍ່ເນື້ອທີ່ການຜະລິດກະສິກໍາຂອງປະຊາຊົນໃນໄລຍະທີ່ຜ່ານ ແລະ ວິທີແກ້ໄຂໃນຕໍ່ໜ້າ; ບົດລາຍງານຂອງພະແນກໂຍທາທິການ ແລະ ຂົນສົ່ງແຂວງ ກ່ຽວກັບການຈັດຕັ້ງປະຕິບັດການຊົດເຊີຍ ຕໍ່ຜູ້ທີ່ໄດ້ຮັບຜົນກະທົບຈາກໂຄງ ການກໍ່ສ້າງເສັ້ນທາງລົດໄຟລາວ-ຈີນ ຊ່ວງຜ່ານແຂວງອຸດົມໄຊ 6 ເດືອນຕົ້ນປີ 2018; ການລາຍງານການເຄື່ອນໄຫວຂອງພະແນກສາທາລະນະສຸກແຂວງກ່ຽວກັບການຈັດຕັ້ງປະຕິບັດບັນດາຄາດໝາຍທີ່ສະພາປະຊາຊົນແຂວງໄດ້ຮັບຮອງໃນກອງປະຊຸມສະໄໝສາມັນເທື່ອທີ່ 4 ຜ່ານມາ; ການລາຍງານສະພາບການແກ້ໄຂປະກົດການຫຍໍ້ທໍ້ໃນສັງຄົມ ເປັນຕົ້ນບັນຫາຢາເສບຕິດ ແລະ ອຸປະຕິເຫດຕາມທ້ອງຖະໜົນ ແລະ ມາດຕະການແກ້ໄຂໃນຕໍ່ໜ້າ.

​​ໃນ​ໂອກາດ​ກ່າວ​ໄຂ​ກອງ​ປະຊຸມ​ສະມະ​ຊິກ​ສະພາ​ປະ​ຊາ​ຊົນ​ແຂວງ ສະ​ໄໝ​ສາມັນ​ເທື່ອ​ທີ່ 5, ທ່ານ ບຸນ​ລອດ ອ່ອນພະຈັນ ປະທານ​ກອງ​ປະຊຸມ ​ໄດ້​ຮຽກຮ້ອງມາຍັງບັນດາທ່ານສະມາຊິກສະພາປະຊາຊົນແຂວງແລະຜູ້ແທນທີ່ເຂົ້າຮ່ວມກອງປະຊຸມຈົ່ງເຊີດຊູຄວາມຮັບຜິດຊອບການເມືອງຂອງຕົນ,ສຸມສະຕິປັນຍາ ແລະ ເສີມຂະຫຍາຍປະຊາທິປະໄຕເຂົ້າໃນການຄົ້ນຄວ້າປະກອບຄຳເຫັນຕໍ່ເນື້ອໃນທີ່ນຳມາພິຈາລະນາໃນກອງປະຊຸມຢ່າງມີຈຸດສຸມ, ມີເຫດມີຜົນ ແລະ ຮັບປະກັນຄວາມຖືກຕ້ອງສອດຄ່ອງ.

ຕະຫລອດວາລະກອງປະຊຸມຮຽກຮ້ອງມາຍັງອົງການຈັດຕັ້ງພັກ-ລັດ,ກໍ່ຄືປະຊາຊົນບັນດາເຜົ່າໃນທົ່ວແຂວງຈົ່ງໄດ້ຮ່ວມຕິດຕາມແລະໃຫ້ການສະໜັບສະໜູນແກ່ການດຳເນີນກອງປະຊຸມໃຫ້ສຳເລັດຜົນຢ່າງຈົບງາມ. ກອງປະຊຸມໄດ້ເປີດໂທລະສັບສາຍດ່ວນ 081 156 ເພື່ອຮັບຄຳສະເໜີຂອງປະຊາຊົນບັນດາເຜົ່າໃຫ້ກອງປະຊຸມພິຈາລະນາ ພ້ອມທັງໄດ້ມີການຖ່າທອດສົດທາງວິທະຍຸກະຈາຍສຽງຂອງແຂວງ

ຂ່າວ: ວັນສີ ພວງມະໄລ