ເຈົ້າແຂວງ ອຸດົມໄຊຜູ້ໃຫມ່ຢືນຢັນວ່າຈະພັດທະນາແຂວງ ອຸດົມໄຊໃຫ້ເຕີບໃຫຍ່ຢ່າງກ້າວກະໂດດຂັ້ນ.

ໃນໂອກາດຂື້ນຮັບຫນ້າທີ່ໃນການຖືກຮັບຮອງເປັນເຈົ້າແຂວງອຸດົມໄຊຢ່າງເປັນທາງການ ຈາກສະມາຊິກສະພາປະຊາຊົນແຂວງ ຕາມການສະເໜີຂອງຄະນະປະຈຳສະພາປະຊາຊົນແຂວງ ໃນກອງປະຊຸມສະໄຫມສາມັນເທື່ອທີ 5 ສະພາປະຊາຊົນແຂວງອຸດົມໄຊຊຸດທີ I ໃນວັນທີ 30 ສິງຫາ ນີ້. ທ່ານ ປອ ຄຳພັນ ເຜີຍຍະວົງ ກຳມະການສູນກາງພັກ ເລຂາພັກແຂວງ ເຈົ້າແຂວງອຸດົມໄຊ ກ່ອນອື່ນທ່ານໄດ້ສະແດງຄວາມຍ້ອງຍໍຊົມເຊີຍຕໍ່ການຊີ້ນຳໆພາ ຂອງອົງການປົກຄອງແຂວງ ອຸດົມໄຊ ໄລຍະຜ່ານມາເຊີ່ງໄດ້ເຮັັດໃຫ້ມີຜົນສຳເລັດຫລາຍດ້ານ ເປັນຕົ້ນ ໄດ້ເຮັດໃຫ້ແຂວງມີສະຖຽນລະພາບທາງດ້ານການເມືອງ ສັງຄົມມີຄວາມສະຫງົບແລະເປັນລະບຽບຮຽບຮ້ອຍໂດຍພື້ນຖານ, ເສດຖະກິດມີການຂະຫຍາຍຕົວຢ່າງຕໍ່ເນື່ອງ, ຊີວິດການເປັນຢູ່ຂອງປະຊາຊົນບັນດາເຜົ່າໄດ້ຮັບການພັດທະນາ ແລະ ປັບປຸງໃຫ້ດີຂື້ນ, ການພົວພັນຮ່ວມມືກັບຕ່າງປະເທດໄດ້ຮັບການເສີມຂະຫຍາຍກວ້າງຂວາງ.

ທັງຫມົດນີ້ຈະເປັນເງື່ອນໄຂໃນການຊີ້ນຳໆພາ ຂອງອົງການປົກຄອງແຂວງ ໃນຕໍ່ຫນ້າ ໃນໂອກາດຮັບຫນ້າທີ່ເປັນເຈົ້າແຂວງ ອຸດົມໄຊ ທ່ານພ້ອມແລ້ວທີ່ຈະເຮັດຫນ້າທີ່ເຈົ້າແຂວງດ້ວຍຄວາມຮັບຜິດຊອບສູງ, ຈະນຳພາອົງຄະນະພັກ, ຄະນະອົງການປົກຄອງແຂວງ ສຸມທຸກຄວາມພະຍາຍາມ ແລະ ເສີມຂະຫຍາຍກຳລັງແຮງສັງລວມຂອງທົ່ວສັງຄົມ ເຊີດຊູຈິດໃຈເອກະລາດ, ຮັກຊາດແພງເຊື້ອ, ເປັນເຈົ້າຕົນເອງ ເພີ່ງຕົນເອງແລະ ສ້າງຄວາມເຂັ້ມແຂງດ້ວຍຕົນເອງ ສົມທົບການຍາດແຍ່ງກາລະໂອກາດແລະເງື່ອນໄຂສະດວກຈາກພາຍນອກ  ຫັນເອົາສິ່ງທ້າທາຍໄປເປັນໂອກາດ ໃນການພັດທະນາແຂວງໃຫ້ເຕີບໃຫຍ່ຢ່າງກ້າວກະໂດດຂັ້ນ, ເຮັດໃຫ້ເສດຖະກິດຂອງແຂວງ ຂະຫຍາຍຕົວແຕ່ 7,7% – 8% ຂື້ນໄປໃນແຕ່ລະປີ  ຮອດປີ 2020 ໃຫ້ສາມາດຫລຸດເນື້ອທີ່ການຖາງປ່າເຮັດໄຮ່ປູກເຂົ້າ ແລະ ຄອບຄົວທຸກຍາກໃຫ້ບັນລຸຕາມຄາດຫມາຍ, ເຮັດໃຫ້ແຂວງມີພື້ນຖານໂຄງລ່າງດ້ານເສດຖະກິດ, ເຕັກນິກດ້ານ ວັດທະນະທຳ, ວິທະຍາສາດ ແລະ ບຸກຄະລາກອນມີຄຸນນະພາບເພື່ອຮອງຮັບການຫັນເປັນອຸດສະຫະກຳ ແລະ ທັນສະໄຫມໃນອານາຄົດ ເຮັດໃຫ້ຊີວິດການເປັນຢູ່ຂອງປະຊາຊົນໄດ້ຮັບການຍົກລະດັບດີຂື້ນ ສະເລ່ຍລາຍຮັບຕໍ່ຫົວຄົນຮອດປີ 2020 ໃຫ້ໄດ້ 1800 ໂດລາສະຫະລັດຕໍ່ຄົນຕໍ່ປີ.

ອົງການປົກຄອງແຂວງຈະເອົາໃຈໃສ່ເປັນພິເສດໃນການຊຸກຍູ້ສົ່ງເສີມພາກສ່ວນເສດຖະກິດ, ທຸລະກິດ, ຜູ້ປະກອບການ ທັງພາຍໃນ ແລະ ຕ່າງປະເທດປະກອບສ່ວນເຂົ້າໃນການພັດທະນາແຂວງ ອຸດົມໄຊ ໃຫ້ຫລາຍຂື້ນ  ບັນຫາສຳຄັນກວ່າຫມູ່ແມ່ນຈະສຸມໃສ່ສ້າງນັກທຸລະກິດພາຍໃນ ໃຫ້ມີຄວາມເຕີບໃຫຍ່ເຂັ້ມແຂງ, ສາມາດແກ່ງແຍ່ງແຂ່ງຂັນກັບນັກລົງທຶນຕ່າງປະເທດ ແລະ ສາມາດດຶງດູດເອົານັກທຸລະກິດຕ່າງປະເທດມາເປັນຄູ່ຮ່ວມໃນການລົງທຶນກິດຈະການຕ່າງໆພາຍໃນແຂວງ ສິ່ງທີ່ຮີບດ່ວນໃນປະຈຸບັນແມ່ນການພື້ນຟູແລະ ປັບປຸງຊີວິດການເປັນຢູ່ຂອງປະຊາຊົນທີ່ໄດ້ຮັບຜົນກະທົບຈາກໄພພິບັດນ້ຳຖ້ວມໃນໄລຍະຜ່ານມາ, ເພື່ອເຮັດໃຫ້ໄດ້ຕາມຄາດຫມາຍທີ່ວາງໄວ້ ອົງການປົກຄອງແຂວງ ຈະໄດ້ເອົາໃຈໃສ່ໃນການປັບປຸງບູລະນະການຈັດຕັ້ງ, ຈັດວາງພະນັກ ງານຈຳນວນຫນຶ່ງໃຫ້ຖືກຕ້ອງສອດຄ່ອງຕາມວຽກງານຕົວຈິງ ຕິດພັນກັບການສຶກສາອົບຮົມການເມືອງແນວຄິດໃຫ້ແກ່ພະນັກງານ-ສະມາຊິກພັກ ແລະ ປະຊາຊົນຊັ້ນຄົນຕ່າງໆໃຫ້ມີແນວຄິດອຸ່ນອ່ຽນທຸ່ນທ່ຽງ, ເຊື້ອໝັ້ນຕໍ່ການຊີ້ນນຳໆພາຂອງພັກ ແລະ ອົງການປົກຄອງແຂວງ ອຸດົມໄຊ.

ຂ່າວ: ຄຳພູສະຫວັນ ເພັນສະຫວັດ